Image default
Жаңылыктар

Түмөнбай Колдошов венгриялык окумуштуулар Шант Иштван менен доктор Шомфаи Кара Давиддин “Азиянын жүрөгүнөн келген каттар жана сүрөттөр» аттуу китебинин бет ачарына катышты

Кыргыз Республикасынын Маданият, маалымат, спорт жана жаштар саясаты министринин орун басары Түмөнбай Колдошов венгриялык окумуштуулар доктор Шант Иштван менен доктор Шомфаи Кара Давиддин “Азиянын жүрөгүнөн келген каттар жана сүрөттөр» аттуу кыргыз жана орус тилдеринде басылып чыккан китебинин салтанаттуу бет ачарына катышты.
Китепте венгер саякатчысы жана изилдөөчүсү Дьерд Алмашинин 1906-жылдагы Борбордук Азиядагы экинчи экспедициясына байланыштуу каттарынан чогултулган уникалдуу тарыхый-этнографиялык материалдар, ошондой эле анын саякат учурунда тарткан сүрөттөрү камтылган.
Венгриялык көрүнүктүү саякатчы, чыгыш таануучу жана этнограф Дьерд Алмаши Кыргызстанга 1900 жана 1906-жылдары эки жолу экспедиция жасаган. Алмашинин Орто Азияга жасаган саякаттары тууралуу жазган каттары, 20-кылымдын башындагы кыргыздардын турмуш-тиричилигин билүүгө мүмкүндүк берген сүрөттөрү бүгүнкү күнгө чейин сакталып калган. Ошондой эле, Дьерд Алмаши Турган Бердике уулу деген кыргыз котормочу менен биргеликте «Манас» эпосунун 72 саптык фрагментин кыргыз тилинен которуп, Европага алып кеткен.
Китептин авторлору доктор Шанта Иштван, доктор Шомфаи Кара Давид жана Аида Памирбек-Шомфай илимге кошкон салымы үчүн, ошондой эле, Кыргызстандын жана Венгриянын ортосундагы дипломатиялык мамилелердин 30 жылдыгынын алкагында министрликтин Ардак грамоталары менен сыйланышты.