Бишкектин борбордук Ала-Тоо аянтында аскердик парад өттү
Бүгүн, 8-майда Президент - Кыргыз Республикасынын Куралдуу Күчтөрүнүн Жогорку Башкы колбашчысы Садыр Жапаровдун катышуусунда борбордук “Ала-Тоо” аянтында өлкөнүн Куралдуу Күчтөрүнүн бөлүктөрүнүн жана башка күч түзүмдөрүнүн катышуусунда салтанаттуу аскердик парад өттү.
Параддын алдында Кыргызстандын заманбап армиясы тууралуу кыскача видеоролик көрсөтүлдү. Андан соң Президент куттуктоо сөзүн сүйлөп, анда тарыхый Жеңиштин маанисин белгилеп, тынчтыкты коргоп калган муундардын эрдигин жана баатырдыгын баса белгиледи.
Расмий бөлүктөн кийин парад аскер бөлүктөрүнүн салтанаттуу маршы, заманбап аскердик техникалардын демонстрациясы, күжүрмөн учактардын учуулары бириккен аскердик оркестрдин аткаруусундагы чыгармалардын коштоосунда өттү.
Иш-чаранын соңунда Президент Садыр Жапаров өздүк курамга ыраазычылык билдирип, параддык бөлүктөрдүн башчылары менен саламдашты.
Белгилей кетсек, Улуу Ата Мекендик согуштагы Жеңиштин 80 жылдыгына арналган салтанаттуу иш-чаралар Коргоо министрлиги, Маданият, маалымат жана жаштар саясаты министрлиги, Бишкек шаарынын мэриясы тарабынан уюштурулду.
