Маданият министри Б. Кыдыкеева атындагы жаш көрүүчүлөр театрынын оңдоо иштеринин жүрүшү менен таанышты
Бүгүн, 18-апрелде Кыргыз Республикасынын Маданият, маалымат жана жаштар саясаты министри Мирбек Мамбеталиев Б. Кыдыкеева атындагы жаш көрүүчүлөр театрына барып, ал жакта жүрүп жаткан оңдоп-түзөө иштеринин жүрүшү менен жеринен таанышты.
Калктын маданий тарбиясына жана жаш муундун эстетикалык деңгээлин калыптандырууга олуттуу салым кошуп келген аталган театр учурда өлкө боюнча маданий инфратүзүмдөрдү жаңылоо боюнча мамлекеттик программанын алкагында капиталдык оңдоп-түзөөдөн өткөрүлүүдө.
Министрдин айтымында, министрлик театр мекемелерин калыбына келтирүүгө, айрыкча балдардын жана жаштардын руханий дүйнөсүнө, көркөм табитине таасир этүүчү маданий жайларга өзгөчө маани берилет.
“Бакен Кыдыкеева атындагы театр — бул жөн гана сахна эмес, бул жаш көрүүчү үчүн искусство менен алгачкы таанышуусу, жан дүйнөсүнө таасир этүүчү өзгөчө мейкиндик. Биз бул театрды мүмкүн болушунча тезирээк ишке киргизүүгө бардык күч-аракетибизди жумшайбыз”, — деди министр.
Министр иш сапардын алкагында театр жетекчилиги менен жолугуп, оңдоо иштеринин мөөнөттөрүн жана техникалык камсыздоо, архитектуралык көрүнүштүн сакталуусу сыяктуу маселелерди талкуулады.
Капиталдык оңдоп-түзөөдөн кийин театр заманбап шарттагы, балдар жана жаштар үчүн арналган спектаклдерди коюуга ыңгайлашкан маданий жай катары ишмердүүлүгүн улантат деп күтүлүүдө. Жаңыланган имарат артисттер үчүн да, көрүүчүлөр үчүн да ыңгайлуу жана заман талабына жооп берген шарттарды камсыздайт.
