Алтынбек Максутов Кыргызстандагы телерадио уюмдарды ата мекендик контент менен камсыздоо боюнча телеканалдардын өкүлдөрү менен жолукту
Бүгүн, 28-мартта Кыргыз Республикасынын Маданият, маалымат, спорт жана жаштар саясаты министри Алтынбек Максутовдун катышуусунда мамлекеттик тилди өнүктүрүү максатында Кыргыз Республикасынын телерадио уюмдарын ата мекендик контент менен камсыздоо боюнча өлкөбүздүн телеканалдарынын өкүлдөрү менен жыйын өттү.
Министр өз сөзүндө мамлекеттик тилдеги контенттин аз болуп жаткандыгын баса белгилеп, көйгөйдү чечүүгө биргелишип аракет кылуу керек экендигин ырастап, “Кыргыз Республикасынын мамлекеттик тили жөнүндө” Кыргыз Республикасынын Конституциялык Мыйзамынын 20-беренесине ылайык телерадио уюмдары үчүн мамлекеттик тилде берүүнүн милдеттүү (минималдуу) көлөмү 60 пайыздан кем болбошу керек жана берүү тартиби “Телекөрсөтүү жана радиоуктуруу жөнүндө” Кыргыз Республикасынын Мыйзамы менен белгиленгендигин айтты.
Ошондой эле, жолугушуунун жүрүшүндө министр тарабынан “Кыргызтасмасы” Мамлекеттик киноборбору” мекемеси аркылуу Кыргызстандагы бардык телеканалдарын ата мекендик өндүрүштөгү контент менен камсыз кылуу маселеси каралып жаткандыгы тууралуу айтылды.
Ошону менен бирге мисал катары, “Кыргызсериал” чыгармачыл-өндүрүштүк бирикмеси мамлекеттик мекемеси тарабынан жаш балдар үчүн тартылган фильмдерди, мультфильмдерди, сериалдарды жайылтууга бирдей мүмкүнчүлүктөр жарала тургандыгын билдирди.
Мындан тышкары, улуттук аудиовизуалдык социалдык маанилүү контентти түзүү, массалык коммуникация каражаттарынын ата мекендик контентин өнүктүрүү үчүн Министрликтин бюджетинен 100 миллион сом акча каражаты каралгандыгы тууралуу сөз болду. Аталган каражатты ата мекендик продукцияны өндүрүү жана дубляж кылууга багыттоо боюнча да тапшырма коюлгандыгы тууралуу айтылды.
Өз кезегиде Кыргызстандын телеканалдарынын өкүлдөрү мындан ары биргелешип иштөөгө даяр экендигин билдиришип, ата мекендик контентти өнүктүрүү үчүн мамлекет тарабынан колдоо көрсөтүлүп жаткандыгына ыраазычылык билдиришти.
