Алтынбек Максутов Өзбекстанга болгон иш сапарынын алкагында окуусу толук кыргыз тилинде өткөн орто мектепте болду

Кыргыз Республикасынын Маданият, маалымат, спорт жана жаштар саясаты министри Алтынбек Максутов Кыргызстан жана Өзбекстан Республикаларынын дипломатиялык кызматташтыгынын 30 жылдыгына арналган маданий иш чаранын алкагында Ташкент облусунун Паркент райондук № 33 окуусу толук кыргыз тилинде өткөн орто мектепте болду.

Жолугушууга министр менен бирге Кыргыз Республикасынын эл артисти Саламат Садыкова, Кыргыз Республикасынын эмгек сиңирген артисти Токтобек Асаналиев барып, ага мектеп жетекчилиги жана окуучулар катышып чыгармалык баарлашуу форматында өттү.

Алтынбек Максутов мектепке Айтматовдун кыргыз тилинде жарык көргөн жаңы китептерин тапшырып жатып, мындай жолугушуу абдан таасирдүү болгонун, кыргыз тилинде Айматовдун чыгармаларын дал өзүндөй кылып аткарган окуучуларга ыраазычылык айтып, кыргыз маданиятын сактоо жана өнүктүрүү максатында ар дайым мектеп менен байланышта боло тургандыгын белгилеп, окууларга жана мектепте тарбия берип жаткан окутуучулар курамына ийгилик каалап, бийик максаттарга жетүү үчүн, алдыга болгон умтулуу жана аракет күчтүү болуш керектигин белгиледи.

Жолугушуу учурунда мектеп окуучулары тарабынан чакан концерттик программага тартууланып, Чынгыз Айматовдун “Саманчынын жолу” чыгармасынан үзүндүү көрсөтүлдү.

№33 орто мектеп, Кыргызоглы айылында жайгашкан.