Анджей Бартковяк Бишкекте кинонун көркөм тили боюнча мастер-класс өттү
III Бишкек эл аралык кинофестивалынын программасынын алкагында дүйнөгө белгилүү поляк тектүү америкалык кинорежиссёр, оператор жана продюсер Анджей Бартковяк “Кинонун көркөм тили: Жарыктан кыймылга” аттуу практикалык сабак өттү.
Иш-чара Компас колледжинде өтүп (Compass College), ага кино тармагында эмгектенген ишмерлер, режиссёрлор, операторлор жана бул багытта билим алып жаткан студенттер катышты.
Мастер-класс учурунда Анджей Бартковяк кинону тартууда визуалдык стиль кандайча түзүлөрүн, жарык менен иштөө ыкмаларын, камера кыймылы аркылуу баяндоону тереңдетүүнүн жолдорун түшүндүрүп берди. Ал өзүнүн чыгармачылык тажрыйбасынан бөлүшүп, белгилүү тасмалардан алынган кадрлар, музыка тандоосу жана локациянын таасири тууралуу мисалдарды келтирди.
Иш-чаранын жүрүшүндө катышуучулар менен суроо-жооп форматында пикир алмашуу болуп, кинематографиялык продукциянын жаралыш процесси талкууланды.
