Бишкекте “Жашоо ыргактары” аттуу көргөзмөсү ачылды
Бүгүн, 17-декабрда, Гапар Айтиев атындагы Кыргыз улуттук көркөм сүрөт музейинде таланттуу сүрөтчү, скульптор, Чыңгыз Айтматов атындагы мамлекеттик сыйлыктын лауреаты, Кыргыз Республикасынын жана Казакстандын маданиятынын отличниги Тамила Маматованын “Жашоо ыргактары” аттуу жеке көргөзмөсүнүн салтанаттуу ачылыш аземи болду.
Министрдин орун басары Гүлбара Абдыкалыкова Тамила Маматованын өзгөчө талантын жана кыргыз көркөм өнөрүнө кошкон зор салымын баса белгиледи:
“Тамила Маматова – өлкөбүздүн сыймыгы. Ал портреттик скульптурага чоң шыктануу жана дем менен кайрылып, поэзия менен көркөм сезимди айкалыштырган чыгармаларды жаратып келет. Анын чыгармалары – бул жөн гана чеберчилик эмес, кыргыз элинин жан дүйнөсүн жана мүнөзүн терең чагылдырат. Өзгөчө анын Чыңгыз Айтматов, Т. Турсунбаева жана Б. Исакова сыяктуу көрүнүктүү инсандардын скульптуралары өзгөчөлүккө ээ.”
Тамила Маматова тууралуу
Тамила Абдинабиевна Маматова – азыркы доордун көрүнүктүү сүрөтчү жана скульпторлорунун бири болуп саналат. Анын ысымы жогорку кесипкөйлүктүн жана өнөргө берилгендиктин символуна айланган. Ал Дүйнөлүк скульпторлор ассоциациясынын (ISSA) мүчөсү, Казакстандын “Достык” орденинин II даражасынын ээси жана Чыңгыз Айтматов атындагы мамлекеттик сыйлыктын лауреаты. Анын монументалдык скульптуралары он өлкөнүн шаарларын кооздоп, терең мазмуну жана эмоциялык көркөмдүгү менен суктандырат.
2018-жылы И.Е. Репин атындагы белгилүү живопись, скульптура жана архитектура институтун аяктагандан кийин Тамила мекенине кайтып келип, чыгармачылык ишмердүүлүгүн жаңы дем менен уланткан. Анын дипломдук иши – улуу кыргыз жазуучусу Чыңгыз Айтматовдун скульптурасы – чыныгы шедевр болуп, кийинки көптөгөн чыгармаларына шыктануу булагына айланган.
“Жашоо ыргактары” көргөзмөсү
“Жашоо ыргактары” көргөзмөсү Тамилa Маматовaнын ар кайсы мезгилди камтыган чыгармалардын көргөзмөсү болуп саналат. Экспозицияда 37 чыгарма коюлуп, алардын 28и дүйнөнүн он өлкөсүнүн шаарларында орнотулган. Портреттик скульптуралар өзгөчө орунду ээлеп, анда сүрөтчү атактуу инсандардын мүнөзүн жана ички дүйнөсүн так чагылдырат.
Ар бир экспонат адамзат табиятын жана улуттук өзгөчөлүктү терең түшүнүүнү чагылдырып, Тамилa Маматовaнын чыгармаларын азыркы кыргыз искусствосу үчүн маанилүү ачып берет.
Көргөзмөнүн мааниси
“Жашоо ыргактары” жеке көргөзмөсү – бул сүрөтчүнүн жетишкендиктерин көрсөтүү менен бирге, жаш муунду шыктандырууга жана кыргыз маданий мурасын сактоонун маанисин баса белгилеген маданий окуя болуп саналат. Тамилa Маматовaнын эмгектери – убакыттын ритмин, улуттук мүнөздү жана адамзатка болгон терең сый-урматты даңазалаган жандуу чыгармалар.
Көргөзмө 2025-жылдын 5-январына чейин уланат.
