Кыргызстан Ленин Коммунисттик Жаштар Союзунун 100 жылдыгына арналган салтанаттуу иш-чара болуп өттү
Бүгүн, 25-майда Т. Сатылганов атындагы Кыргыз улуттук филармониясында Кыргызстан Ленин Коммунисттик Жаштар Союзунун түзүлгөндүгүнүн 100 жылдыгына арналган салтанаттуу иш-чара болуп өттү.
Иш-чарага Кыргыз Республикасынын Мамлекеттик катчысы Марат Иманкулов, Маданият, маалымат жана жаштар саясаты министри Мирбек Мамбеталиев, ардагер комсомолдор, чет өлкөлүк меймандар, коомдук ишмерлер, мамлекеттик жетекчилер, жаштар уюмдарынын өкүлдөрү жана тарыхчылар катышты.
Майрамдык иш-чаранын алкагында атайын даярдалган тематикалык видеотасма көрсөтүлүп, расмий бөлүктү Кыргызстан Ленин Коммунисттик Жаштар Союзунун Борбордук Комитетинин мурдагы катчысы Тилектеш Ишемкулов ачты. Кыргыз Республикасынын Президенти Садыр Жапаровдун саламын жана куттуктоо катын Мамлекеттик катчы Марат Иманкулов тааныштырды.
Салтанаттуу иш-чаранын жүрүшүндө уюштуруу комитетинин мүчөсү Бактыгүл Каламбекова куттуктоо сөзүн сүйлөп, Комсомол ардагерлеринин Кыргызстандын жаштарына кайрылуусун Маданият, маалымат жана жаштар саясаты министринин орун басары Марат Тагаевге тапшырды.
Расмий бөлүк аяктагандан кийин Т. Сатылганов атындагы Кыргыз улуттук филармониясынын, А. Малдыбаев атындагы Кыргыз улуттук академиялык опера жана балет театрынын солисттери жана хору, ошондой эле П.Ф. Шубин атындагы борбордук балдар музыкалык мектебинин хору тарабынан даярдалган концерттик программа тартууланды.
Концерттик программада Кыргыз Республикасынын эл артисттери Бакыт Ыбыкеев, Гүлзинат Суранчиева, Кыргыз Республикасынын эмгек сиңирген артисттери Тилек Найманбаев, Нуржигит Асанов, Заира Раимбекова, ошондой эле жаш таланттар Талант Токомбаев, Айзирек Абдирашитова жана Жазгүл Салидинова, “Шаттык” элдик үлгүлүү бий ансамбли өз өнөрлөрүн тартуулап, А. Жумакматов атындагы мамлекеттик академиялык симфониялык оркестри коштоду.
Иш-чара жалпы катышуучулардын Улуттук филармониянын кире бериш аянтында сүрөткө түшүүсү менен аяктады.
