Кыздар арасында волейбол боюнча зоналдык Азия чемпионатынын (CAVA) жеңүүчүлөрүн сыйлоо аземи болуп өттү
Бүгүн, 25-июлда Дене тарбия жана спорт департаментинин имаратында кыздар арасында волейбол боюнча (U-20) Мальдив аралында өткөн зоналдык Борбор-Азия ассоциациясынын чемпионатынын (CAVA) жеңүүчүлөрүн сыйлоо аземи болду.
Сыйлоо аземинде Тимурлан Ажымалиев алгач спортчуларды жараткан ийгиликтери менен куттуктап, ыраазычылык кат тапшырды.
“Волейбол спортунун тарыхында өз ордуңарды алтын тамга менен жазып жатасыңар. Сиздердин ийгилигиңер талыкпаган эмгектин жана ишке берилгендиктин жыйынтыгы. Бүгүнкү күндө өлкөнү дагы бир кадам алдыга жылуусуна Сиздер себепчи болдуңуздар. Бул чек болбосун. Келечекте волейбол боюнча Азия, Дүйнө жана Олимпиада чемпиондору чыгат деген үмүтүбүз чоң”- деп белгиледи министрдин биринчи орун басары.
Эске салсак, 16-24-июль күндөрү Мальдив аралынын Мале шаарында кыздар арасында Борбор-Азиялык волейбол ассоциациясынын (CAVA) чемпионатыны болуп өттү. Аталган мелдешке 4 өлкөнүн курама командалары (Кыргызстан, Непал, Мальдив жана Шри-Ланка) бири-бири менен айлампа түрүндө беттеш өткөрүп, жыйынтыгында ата мекендик спортчулар жеңүүчү аталган.
