Ош шаарында Кыргызстандын жаратылышын жана маданий көп түрдүүлүгүн чагылдырган көргөзмө өттү
2024-жылдын 26-27-январында БУУнун өнүктүрүү программасы менен өнөктөштүктө Т. Садыков атындагы Ош облустук көркөм сүрөт музейинин эмгек жааматы «ARТүрдүүлүк» чыгармачылык лабораториясынын алкагында Кыргызстандын 7 облусунан келген 40 сүрөтчүнүн Кыргызстандын жаратылышын жана маданий көп түрдүүлүгүн чагылдырган 150дөн ашык живопись жана графика эмгектерин камтыган иш-чараны өткөрүп, элге кубаныч тартуулады.
Демилге Кыргыз жараны концепциясы камтылган жарандык иденттүүлүк баалуулуктарын көркөм өнөр жана тарыхый-маданий мурас аркылуу кеңири жайылтууга багытталды.
Иш-чарада Маданият, маалымат, спорт жана жаштар саясаты министринин орун басары Чыңгыз Эсенгул уулу көргөзмөнүн катышуучуларын куттуктап, “Кыргыз жараны концепциясынын баалуулуктары Кыргызстандын бардык этностук жамааттарынын этномаданий өзгөчөлүгүн сактоо менен аларды бириктирип, искусство жана тарыхый-маданий мурастар аркылуу элдердин биримдигин бекемдөөгө мүмкүндүк берерин” белгиледи.
