Манасчы жана төкмө акын, “Даңк” медалынын ээси Сапарбек Касмамбетовдун 90 жылдыгына арналган “Сахнада Сапарбек” аталышындагы спектакль бүгүн, 11-июнда Шаршен Термечиков атындагы Чүй облустук драма жана сатира театрында көрүүчүлөргө тартууланды.

Иш-чарага Кыргыз Республикасынын Мамлекеттик катчы Сүйүнбек Касмамбетов, Маданият, маалымат, спорт жана жаштар саясаты министринин орун басары Чыңгыз Эсенгул уулу, Ч. Айтматов атындагы тил жана адабият институтунун директору, академик Абдылдажан Акматалиев, Кыргыз улуттук жазуучулар союзунун төрагасы Каныбек Иманалиев, КР эл артисттери жана эл акындары баштаган маданий жана коомдук ишмерлер, театр актёрлору, Кыргыз улуттук «Манас» театрынын жалпы жамааты жана залкар манасчынын жубайы, аталган спектаклдин автору, Кыргыз Республикасынын эмгек сиңирген мугалими, драматург Асангүл Абдыгулова жана уул, кыздары катышты.

Спектаклде Сапарбек Касмамбетовдун балалыгы, манасчылык жолу, үй-бүлөсү, эмгек жолу баяндалып көрүүчүлөргө тартууланды.