Ташкентте композитор Муратбек Бегалиевдин концерти өттү
20-июлда Өзбек Мамлекеттик консерваториясында Кыргыз Республикасынын эл артисти, Токтогул атындагы Мамлекеттик сыйлыктын лауреаты, композитор Муратбек Бегалиевдин концерти өттү.
Концерт Кыргыз Республикасынын Өзбекстан Республикасындагы маданият күндөрүнүн алкагында өтүп, Өзбекстан Мамлекеттик симфониялык оркестринин жана хорунун коштоосунда Кыргыз Республикасынын эл артисти Бакыт Ыбыкеев баштаган бир катар эл аралык вокалдык конкурстарда жеңүүчү аталган солисттер композитор Муратбек Бегалиевдин чыгармаларын аткарды.
Концертке Кыргыз Республикасынын Маданият, маалымат, спорт жана жаштар саясаты министринин биринчи орун басары Тимурлан Ажымалиев жана Өзбекстан Республикасынын Маданият министринин орун басары Юсуфжон Усманов ошондой эле, эки өлкөнүн искусство чеберлери, музыка сүйүүчүлөр катышты.
Концертке Өзбекстан мамлекеттик симфониялык оркестринин башкы дирижёру Алибек Кабдурахманов дирижёрлук кылды. Оркестрдин жетекчиси Өзбекстандын эл артисти Исмаил Джалилов, оркестрдин алдындагы хору, хордун жетекчиси Юлдуз Хуснитдинова, хормейстери Фарогат Абдусаламова колдоо көрсөттү.
