Актау шаарында “Актау – 2025: түрк дүйнөсүнүн маданий борбору” долбоорунун алкагында этношаарчанын ачылышы болуп өттү
4-апрелде Каспий деңизинин жээгинде жайгашкан Актау шаарында (Казакстан) “Актау – 2025: түрк дүйнөсүнүн маданий борбору” аталышындагы ири маданий долбоордун алкагында “Дархан дала” этношаарчасына расмий түрдө старт берилди.
Меймандар үчүн атайын тигилген боз үйлөрдө Кыргызстан, Түркия, Азербайжан, Түркмөнстан, Өзбекстан жана Казакстандан келген кол өнөрчүлөр өз өнөрлөрүн тартуулашты. Кыргыз усталары улуттук кол өнөрчүлүктүн өзгөчө үлгүлөрүн көрсөтүп, этношаарчага келген тургундар менен конокторду маданий мурасыбыз менен тааныштырды.
Иш-чаранын концерттик бөлүгүндө Мангистау облусунун жана түрк тилдүү өлкөлөрдүн өнөр адамдары сахнага чыгышты. Маданий көпүрөгө айланган бул фестивалда кыргыз комузунун, азербайжан балабанынын, түрк багламасынын жана түркмөн дутарынын обондору жаңырды.
Кеченин өзгөчө учурларынын бири — комузчу Талантбек Карабаевдин “Акбакай” аттуу чыгарманы жандуу аткарып, көрүүчүлөрдүн купулуна толгону болду.
Актаудагы этношаарчанын ачылышы түрк дүйнөсүндөгү маданий биримдиктин жана достуктун символу катары өтүп, ар кайсы элдердин руханий жакындашуусунун ачык далили болду.
