Мирбек Мамбеталиев 2025-жыл Актау шаарынын түрк маданиятынын борбору болгондугунун маанилүүлүгүн белгилеп, төмөнкүлөргө токтолду. “Биз маданий иш-чаралардын планын жаңылап, маалымат саясатын биргелешип иш алып барууга ачыкпыз. Бул жердеги кыргызстандык жарандарга маданий иш-чараларды уюштуруп берүүдө ар тараптуу жардам көрсөтүп, улуттук кийимдерди жана кесипкөй хореографтарды жөнөтүүгө даярбыз. Мындан тышкары, Казакстандын Маданият күндөрүн Кыргыз Республикасында өткөрүүнү сунуштайбыз. Кинематография тармагында дагы биргелешкен иш жүргүзүүгө даяр экенибизди билдиребиз”- деди министр.

Өз кезегинде Казакстандын Маданият жана маалымат министри Аида Балаева “Боордош элдин өкүлү катары биз маданиятты өнүктүрүүгө багытталган ар бир демилгени колдоого дайым даярбыз. Биз маданий демилгелерди уюштуруп берүүдөгү иштерге жардам берип, 2026-жылы өтө турчу Дүйнөлүк көчмөндөр оюндарына өз салымыбызды кошууга, ошондой эле, санариптик доордо пайда болгон коркунучтарга каршы биргелешкен чараларды көрүүнү сунуштайбыз” - деди.

Аталган жолугушуу Кыргызстан менен Казакстан ортосундагы эки тараптуу кызматташтыкты тереңдетүүдө жана маданий диалогду өнүктүрүүдө маанилүү кадам болуп, улуттук жана заманбап маданий алмашууну бекемдөөгө өз салымын кошту.