Маданият министри Актау шаарында (Казакстан) ТҮРКСОЙ Эл аралык уюмунун башчысы менен жолукту
Бүгүн, 5-апрелде Казакстандын Актау шаарында Кыргыз Республикасынын Маданият, маалымат жана жаштар саясаты министри Мирбек Мамбеталиев Түрк дүйнөсүнүн маданий уюму (ТҮРКСОЙ) Башкы катчысы Султан Раев менен жолугушту. Жолугушуунун негизги темасы – маданият, маалымат жана жаштар саясаты багытындагы эки тараптуу кызматташтыкты тереңдетүү маселелери.
Жолугушуу учурунда эки тарап биргелешкен долбоорлорду ишке ашыруу, түрк дүйнөсүндө маданий диалогду өнүктүрүү жана маданий мурастарды сактоо боюнча тажрыйба алмашуу мүмкүнчүлүктөрүн талкуулады. Министр Мирбек Мамбеталиев Кыргызстан дайым конструктивдүү диалогго ачык экенин, өлкөнүн маданий мурастарын жана жаштар демилгелерин өнүктүрүүгө умтуларын баса белгиледи.
Мындан сырткары, Түрк дүйнөсүнүн маданий уюму (ТҮРКСОЙ) Кыргызстанга стратегиялык маданий долбоорлорду ишке ашырууда толук колдоо көрсөтүүгө даяр экенин билдирди. Султан Раев маданий демилгелерди өнүктүрүүгө активдүү жардам берүүгө жана түрк элдеринин ортосундагы байланышты бекемдөөгө умтуларын билдирди.
