Азербайжан мамлекеттик бий ансамблинин концерти болуп өттү
Бүгүн, 22-апрелде А. Малдыбаев атындагы Кыргыз улуттук академиялык опера жана балет театрында Азербайжан Республикасынын Кыргыз Республикасындагы Маданият күндөрүнүн алкагында Азербайжан мамлекеттик бий ансамблинин “Менин Азербайжаным” аттуу концерти болуп өттү.
Маданий иш-чарага Кыргыз Республикасынын Министрлер Кабинетинин Төрагасынын орун басары Эдиль Байсалов, Азербайжан Республикасынын Маданият министри Адиль Габиль оглы Каримли, Кыргыз Республикасынын Маданият, маалымат жана жаштар саясаты министринин биринчи орун басары Союзбек Надырбеков, ошондой эле дипломатиялык корпустун өкүлдөрү, маданият жана искусство тармагынын кызматкерлери жана бий өнөрүнүн күйөрмандары катышты.
Концерттин жүрүшүндө Азербайжан мамлекеттик бий ансамбли өзүнүн репертуарындагы улуттук бийлери, түстүү костюмдары жана артисттик чеберчилиги менен көрүүчүлөргө өзгөчө таасир калтырды.
Азербайжан мамлекеттик бий ансамбли 1970-жылы Азербайжандын эл артисти, балетмейстер Алибаба Абдуллаев тарабынан негизделген. Учурда ансамблдин курамында 80 бийчи бийлейт. Кыргызстанда өтүп жаткан Маданият күндөрүнө 40 бийчи өнөр тартуулоо үчүн келген. Ансамблдин көркөм жетекчиси Азербайжан Республикасынын эл артисти Руфат Халилзаде.
