Мирбек Мамбеталиев Түрк маданияты жана мурасы фондунун президенти Актоты Раимкулова менен жолукту
Бүгүн, 12-майда Кыргыз Республикасынын Маданият, маалымат жана жаштар саясаты министри Мирбек Мамбеталиев Түрк маданияты жана мурасы фондунун президенти Актоты Раимкулова менен жолукту.
Анда Кыргызстандын аймагындагы тарыхый-маданий маанидеги объектилерди сактоо маселелери талкууланды. Ошондой эле, Маданият министрлиги, Түрк маданияты жана мурасы фонду жана “КыргызАрхРеставрация” жоопкерчилиги чектелген коомунун ортосунда үч тараптуу келишимге кол коюлду. Аталган документке ылайык, “Караханийлердин конушу” археологиялык эстелигинин үстүнө коргоочу каптама куруу жана Навекат (Красная Речка) шаар калдыгынын аймагында археологиялык-консервациялык иштер жүргүзүлөт.
Аталган эки объект тең Караханийлер доору жана Улуу Жибек жолу менен тыгыз байланышкан кыргыз элинин маданий мурасынын маанилүү бөлүгү болуп саналат. Алардын сакталышы илимий гана эмес, мамлекеттик мааниге да ээ.
Жолугушуунун жыйынтыгында, Мирбек Мамбеталиев маданий мурас өткөндүн элеси гана эмес, келечегибиздин бекем пайдубалы экенин белгилеп, бул долбоор кыргыз элинин тарыхый эстеликтерин коргоого багытталганын, Красная Речкадагы иштер илимге гана эмес, өлкөбүздөгү маданий туризмдин өнүгүшүнө да түрткү берерин билдирди.
