Бишкек шаарында Сооронбай Жусуевге эстелик үчүн ташы орнотулду
Бүгүн, 12-майда Кыргыз Республикасынын Баатыры, Кыргыз Республикасынын эл акыны, ІІІ даражадагы “Манас” орденинин ээси, Токтогул атындагы Мамлекеттик сыйлыктын лауреаты, Улуу Ата Мекендик согуштун катышуучусу Сооронбай Жусуевдин туулган күнүнүн 100 жылдык мааракесинин алкагында Бишкек шаарындагы Тоголок Молдо атындагы сейил бакта акындын эстелиги үчүн ташы орнотулду.
Иш-чарага Кыргыз Республикасынын Жогорку Кеңешинин депутаты Чолпон Султанбекова, Маданият, маалымат жана жаштар саясаты министринин орун басары Тимурлан Ажымалиев, Бишкек шаарынын мэри Айбек Жунушалиев, Кыргыз Республикасынын Улуттук жазуучулар союзунун төрагасы Каныбек Иманалиев жана акындын жакындары, замандаштары, акын-жазуучулар, маданият ишмерлери, күйөрмандары катышты.
Министрдин орун басары Тимурлан Ажымалиев, Сооронбай Жусуевдин элибиздин руханий байлыгына өлчөөсүз салым кошконун, терең философиялык ойлору менен кыргыз поэзиясынын көк тиреген чокусуна айланган улуу инсан экенин белгиледи. Ошондой эле, анын калтырган мурасы – кыргыз элинин улуттук аң-сезиминин жана маданий өзөгүнүн ажырагыс бөлүгү экенин айтты.
Белгилей кетсек, Сооронбай Жусуевдин эстелигинин ташын орнотуу демилгеси акындын туулган күнүнүн 100 жылдык мааракесинин иш-чаралар планына ылайык ишке ашырылды.
