Бишкекте “Түрк дүйнөсүнүн келечеги жана анын жаркыраган жылдызы: жаштар” аттуу эл аралык иш-чара болуп өттү
Бүгүн, 29-апрелде Бишкек шаарындагы “Маариф” билим берүү комплексинде “Түрк дүйнөсүнүн келечеги жана анын жаркыраган жылдызы: жаштар” аттуу эл аралык иш-чара болуп өттү.
Иш-чарага Кыргыз Республикасынын Маданият, маалымат жана жаштар саясаты министри Мирбек Мамбеталиев, Түркия Республикасынын Улуу Улуттук жыйынынын Төрагасы, профессор Нуман Куртулмуш, Түркия Республикасынын Улуу Улуттук жыйынынын өкүлдөрү, Ислам Кызматташтык Уюмунун Жаштар форумунун (ICYF) президенти Таха Айхан, эл аралык “Маариф” фондунун төрагасы Махмут Мустафа Өздил, Бишкек шаарындагы жогорку окуу жайлардын студенттери жана жаштар уюмдарынын өкүлдөрү катышты.
Иш-чаранын расмий бөлүгүн Кыргыз Республикасынын Маданият министри Мирбек Мамбеталиев ачып, түрк элдеринин ортосундагы биримдикти чыңдоодо жаштар негизги күчкө айланышы керектигин, алардын демилгелери жана чыгармачылыгы жалпы келечекти курууда өзгөчө мааниге ээ экенин белгиледи.
Түркия Республикасынын Улуу Улуттук жыйынынын Төрагасы, профессор, Нуман Куртулмуш түрк элдеринин ортосундагы руханий жана маданий байланыштар – келечектеги интеграциянын бекем пайдубалы экенин айтып, жаштар бул байланыштарды чыңдоодо башкы ролду ойнооруна ишеним артарын билдирди.
Бул иш-чара жаштардын идея алмашуусуна, боордош элдердин кызматташтыгын чыңдоого жана келечекке болгон ишенимди бекемдөөгө багытталган маанилүү аянтча болуп, ошону менен иш-чарага Кыргызстандын активдүү 300гө жакын жаштары катышты. Алар түрк дүйнөсүндөгү достук, кызматташтык жана биримдик маселелерин талкуулады.
Иш-чара Түркия Республикасынын Улуу Улуттук жыйынынын Төрагасы, профессор Нуман Куртулмуштун Кыргызстанга расмий сапарынын алкагында уюштурулду.
