Кыргыз киносунун күнүндө кинотаануучу Каарман Ашимов эскерилди
Бүгүн, 17-ноябрда Ч. Айтматов атындагы Кино үйүндө Кыргыз киносу жана кинематографисттер күнү белгиленди. Бул күн кыргыз маданиятынын ажырагыс бөлүгү болгон кино өнөрүнө өз жашоосун арнагандарга маанилүү окуяга айланды.
Иш-чаранын алкагында белгилүү киночулар жана кино таануучулар, айрыкча, кыргыз кинематографиясынын өнүгүүсүнө өзгөчө салым кошкон Каарман Ашимовдун эмгектери эскерилди. Конокторго анын чыгармачылыгына арналган көргөзмө сунушталып, кыргыз киносуна калтырган баа жеткис мурасын тереңирээк ачып көрсөттү.
Иш-чарада Кыргыз Республикасынын Маданият, маалымат, спорт жана жаштар саясаты министри Алтынбек Максутов сөз сүйлөп, бардык кинематографисттерди майрамы менен куттуктады. Министр өз сөзүндө кино өнөрүн өнүктүрүү — бул өлкөнүн маданият чөйрөсүндөгү негизги приоритеттеринин бири экенин баса белгиледи.
«Кино — бул жөн гана искусство эмес. Бул биздин тарыхыбыздын күзгүсү, улуттук өзгөчөлүктү калыптандыруунун жана эл аралык диалогдун күчтүү куралы. Мамлекет бул маанилүүлүктү түшүнүп, тармакты системалуу түрдө колдоп келет. 2025-жылы кино индустриясын өнүктүрүүгө 900 миллион сомдон ашык каражат бөлүнөт. Бул каражаттар жаңы фильмдерди жаратууга, инфраструктураны модернизациялоого жана чыгармачыл демилгелерди колдоого багытталат», — деп белгиледи министр.
Иш-чаранын алкагында кыргыз киносунун тарыхында өзгөчө орунду ээлеген белгилүү тасмалардан үзүндүлөр көрсөтүлдү. Бул дагы бир жолу кыргыз киночуларынын чеберчилиги жана терең мазмундуу чыгармаларды жаратууга болгон умтулуусун баса белгиледи.
Кыргыз киносу салттарды жана заманбап багыттарды бириктирип, улуттук маданияттын маанилүү бөлүгү болуп калууда. Бүгүнкү иш-чара кыргыз киносу таланттуу кесипкөйлөрдүн эмгеги жана мамлекеттин ар тараптуу колдоосу менен активдүү өнүгүп жатканын дагы бир жолу далилдеди.
