Маданият министри Алтынбек Максутов Кыргызстандагы ЮНИСЕФтин жетекчиси менен жолукту
Бүгүн, 18-ноябрда, Кыргыз Республикасынын Маданият, маалымат, спорт жана жаштар саясаты министри Алтынбек Максутов ЮНИСЕФтин Кыргызстандагы жетекчиси Самман Жунг Тапа мырза менен жолугушту. Жолугушууда мектепке чейинки балдардын билим берүүсүн өнүктүрүүгө, жаштар менен тутумдуу иш жүргүзүүгө, ыктыярчылыкты колдоого жана Ю-Репорт программасына багытталган негизги демилгелер талкууланды.
Министр ЮНИСЕФтин “Балдарды эрте өнүктүрүү борбору” программасын Кыргызстандын китепканалары менен музыкалык мектептеринде ишке ашыруунун маанилүүлүгүн белгиледи. Алтынбек Максутов бул программа балдардын нейрондук өнүгүүсүн стимулдап, алардын чыгармачыл жана когнитивдик жөндөмдөрүн калыптандырууда музыка аркылуу чоң роль ойной турганын баса белгиледи. Министрдин пикиринде, музыка балдардын ар тараптуу жана гармониялуу өнүгүүсүндө өзгөчө мааниге ээ болуп, алардын инсандык сапаттарын калыптандырууга оң таасирин тийгизет.
Самман Жунг Тапа мырза бул демилгеге кызыгуу билдирип, ЮНИСЕФ бул маанилүү долбоорду ишке ашырууга керектүү колдоо көрсөтүүгө даяр экенин белгиледи. Анын айтымында, бул долбоор балдарды жана өлкөдөгү билим берүү инфраструктурасын өнүктүрүүгө олуттуу салым кошот.
Мындан сырткары, Самман Тапа мырза 20-ноябрда, Кыргыз улуттук тарых музейинде Балдар күнүнө карата уюштурулган “Кыргызстан балдарынын тарыхый жолу” аттуу көргөзмөнүн ачылышына чакырды. Аталган иш-чара Балдардын укуктары жөнүндө конвенциянын 30 жылдыгына арналган.
Кыргыз Республикасынын Маданият, маалымат, спорт жана жаштар саясаты министри менен ЮНИСЕФтин жетекчиси мындан ары кызматташуу жана жаштар программаларын ишке ашыруунун деталдарын талкуулоо үчүн биргелешкен иш-чараларды өткөрүү тууралуу макулдашты.
Бул кызматташтык Кыргызстандагы балдардын билим берүүсүнүн жана өнүгүүсүнүн сапатын жакшыртууда маанилүү кадам болуп, келечек муундар үчүн жаңы мүмкүнчүлүктөрдү ачат.
