Кыргыздрама театры «Саманчынын жолу» спектакли менен Өзбекстанда
20 - июлда Токтоболот Абдумомунов атындагы Кыргыз Улуттук академиялык драма театрынын чыгармачылык курамы Кыргыз Республикасынын Өзбекстан Республикасындагы маданият күндөрүнүн алкагында Ташкент шаарындагы Мукимий атындагы Өзбекстандын мамлекеттик академиялык чоң театрынын сахнасында «Саманчынын жолу» спектаклин тартуулашты.
Улуу согуш жылдарындагы адамзат башына келген кыйын кезеңди чагылдырган спектаклге Кыргыз Республикасынын Маданият, маалымат, спорт жана жаштар саясаты министринин биринчи орун басары Тимурлан Ажымалиев, Өзбекстан Республикасынын Маданият министринин орун басары Юсуфжон Усманов, Ташкент шаарынын тургундары, театр ишмерлери катышып, көрүүчүлөр тарабынан жылуу кабыл алынды.
"Саманчынын жолу" спектаклинин негизги өзөгү адамзаттын башына түшкөн мүшкүл, оор сыноо, Ата-Мекендик согуш учурду баяндайт. Согуштун зулумдугунан жүрөгү канаган эненин ички трагедиясы, тынчтыкка, бейпилдикке болгон көксөө кеңири чагылдырылган.
Аталган спектакль театр тарабынан эң ийгиликтүү коюлган спектаклдердин бири болуп саналып, эл аралык театр фестивалдарында байгелүү орундарды татыктуу алып келет.
