Кыргыз Республикасынын Өзбекстан Республикасындагы маданият күндөрүнүн жабылыш аземинин гала-концерти өттү
20-июлда Кыргыз Республикасынын Өзбекстан Республикасында өтүп жаткан маданият күндөрүнүн расмий жабылыш салтанаты Ташкент шаарындагы «Голубые купола» эс алуу багында өттү.
Салтанаттуу жабылыш аземге Кыргыз Республикасынын Маданият, маалымат, спорт жана жаштар саясаты министринин биринчи орун басары Тимурлан Ажымалиев, Өзбекстан Республикасынын Маданият министринин орун басары Юсуфжон Усманов, шаар жетекчилиги, Ташкент шаарынын тургундары, эки мамлекеттин өнөр адамдары катышты.
Эки элдин достугун, бай тарыхын жана маданиятын даңазалаган иш-чара көрүүчүлөр тарабынан жылуу кабыл алынды.
Улуттук ыр-бийден дүйнөлүк чыгармаларга чейин жаңырган концерттик программа Кыргыз Республикасынын маданиятына эмгек сиңирген ишмер Нур Өмүрбаев жетектеген Чоро Кожомжаров атындагы эстрадалык-симфониялык оркестринин коштоосунда болуп, Токтогул Сатылганов атындагы Кыргыз Улуттук филармониясынын жана Абдылас Малдыбаев атындагы Кыргыз Улуттук академиляылк опера жана балет театрынын белгилүү солисттеринин, Улуттук Манас театрынын манасчы төкмө акындарынын аткаруусундагы чыгармалар жаңырды.
Салтанат кыргыз уз чеберлеринин жана зергер-усталарынын көргөзмөсү менен коштолуп, кыргыз айылы өзгөчө шаңга бөлөндү.
Эске салсак, аталган маданият күндөрү 2023-жылдын 26-27-январь күндөрү Өзбекстан Республикасынын Президенти Ш. М. Мирзиеевдин Кыргыз Республикасына болгон мамлекеттик сапарынын жыйынтыгы менен жетишилген макулдашууларды ишке ашыруу боюнча Иш-чаралардын планынын Жол картасы жана 2024-жылдын 3-майында Өзбекстан Республикасынын Ташкент шаарында өткөн Кыргыз Республикасы менен Өзбекстан Республикасынын ортосундагы эки тараптуу кызматташуу тууралуу Өкмөттөр аралык 11-жыйынын негизинде ишке ашты.
Жалпысынан маданият күндөргө Кыргызстандын чыгармачылык интеллигенция өкүлдөрү, Кыргыз Улуттук “Манас” театры, Абдылас Малдыбаев атындагы Кыргыз Улуттук академиялык опера жана балет театрынын солисттери, Т. Сатылганов атындагы Кыргыз Улуттук филармониясынын Чалагыз Исабаев атындагы “Камбаркан” фольклордук – этнографиялык ансамбли, Чоро Кожомжаров атындагы эстрада-симфониялык оркестри, Нурдин Түгөлов атындагы Кыргыз Мамлекеттик “Ак-Марал” бий ансамбли, Т. Абдумомунов атындагы Кыргыз Улуттук академиялык драма театры, Кыргыз Улуттук тарых музейи, “Дилгир” жана “Шаттык” үлгүлүү бий ансамблдери, белгилүү кино ишмерлери, кол өнөрчүлөр жана белгилүү солисттер катышты.
