Кыргызстан менен Өзбекстандын ортосундагы маданий байланыштар: жалпы баалуулуктар, кызматташтыктын тарыхы жана келечеги талкууланды
Ташкент шаарында өтүп жаткан Кыргыз Республикасынын Маданият күндөрүнүн алкагында кыргыз-өзбек интеллигинция өкүлдөрүнүн катышуусунда «Кыргызстан менен Өзбекстандын ортосундагы маданий байланыштар: жалпы баалуулуктар, кызматташтыктын тарыхы жана келечеги» темасында тегерек стол өттү.
Министрдин биринчи орун басары Тимурлан Ажымалиев Кыргызстан менен Өзбекстандын ортосундагы маданий жана интеллектуалдык байланыштарды бекемдөөгө арналган жолугушуунун маанилүүлүгүн белгилеп, төмөндөгүлөргө токтолду.
Бүгүнкү интеллигенция өкүлдөрүнүн жолугушуусу жалпы чакырыктарды талкуулоо, орток пикирге келүү жана андан ары кызматташуунун жолдорун аныктоо үчүн уникалдуу мүмкүнчүлүк болуп саналат.
Биздин өлкөлөрдү терең тарых менен байланыштырган узак жана бай тарых бар. Кыргызстан менен Өзбекстан ар дайым соода жолдору кесилишкен жана илим, искусство жана адабият өнүккөн маданий борбор болуп келген. Биздин элдер ар дайым билим, маданий баалуулуктар жана руханий мурастар менен алмашып келген. Мындай байланыш жана ушул форматтагы жолугушуулар келечекте өз жемишин берет деген ишенимин билдирип, маданият элдердин ортосундагы байланышты чыңдоодо чоң роль ойной тургандыгын, ал эми театр, кино, адабият – бул бири-бирибизди жакындан түшүнүүгө, жалпы баалуулуктарды жана каада-салттарды билүүгө жардам берген куралдар деп белгиледи.
Ошондой эле ал бай маданий мурастарыбызды бөлүшүү үчүн биргелешкен көргөзмөлөрдү, спектаклдерди жана адабий кечелерди уюштуруу зарылдыгын айтып, бул жолугушуу жаңы кадамдарга жол ачып биргелешкен долбоорлордун үстүндө иштешибиз керек деп кошумчалады.
Жыйындын жүрүшү эркин формата өтүп, эки тараптуу кызматташуунун негизги артыкчылыктуу багыттары талкууланып, алдыдагы биргелешкен долбоорлорду алдыга жылдыруу макулдашылды.
Эсте салсак, достук жана маданий алаканы бекемдей турган жыйын Өзбекстан жазуучулар союзунун имаратында өттү.
