Маданият министринин биринчи орун басары С.А.Чуйков атындагы Кыргыз Мамлекеттик көркөм сүрөт окуу жайынын жаңы директорун тааныштырды
Бүгүн, 8-апрелде Кыргыз Республикасынын маданият, маалымат жана жаштар саясаты министринин биринчи орун басары Союзбек Надырбеков С.А. Чуйков атындагы Кыргыз мамлекеттик көркөм сүрөт окуу жайына иш сапары менен барды.
Анда Союзбек Надырбеков окуу жайдын азыркы абалы менен таанышып, педагогикалык жамааты менен жолугушту. Өзгөчө көңүл билим берүү процессин модернизациялоо жана материалдык-техникалык базаны чыңдоо маселелерине бурулду.
Жолугушуунун жүрүшүндө министрдин биринчи орун басары окуу жайдын жаңы директорун эмгек жамаатка тааныштырды. Кыргыз Республикасынын маданият, маалымат жана жаштар саясаты министри Мирбек Мамбеталиевдин буйругуна ылайык, аталган кызматка Төлбашыева Жаңыл Үсөновна дайындалды.
Союзбек Надырбеков Жаңыл Үсөновнаны кызматка дайындалышы менен куттуктап, анын жетекчилиги алдында көркөм сүрөт окуу жайы өз өнүгүүсүн заман талабына ылайык улантып, жаңы чыгармачыл горизонтторду багынтаарына ишенимин билдирди.
Жолугушуунун соңунда министрдин биринчи орун басары окуу жайдын жалпы жамаатына иштеринде ийгиликтерди, чыгармачылык шыктанууну жана кыргыз маданияты менен искусствосунун өнүгүшүн каалады.
