Маданият министрлигинде Кыргыз Республикасынын Тышкы иштер министрлигинин өкүлдөрү менен жолугушуу өттү
Бүгүн, 2-апрелде Маданият, маалымат жана жаштар саясаты министрлигинде Кыргыз Республикасынын Тышкы иштер министрлигинин өкүлдөрү менен жолугушуу болуп өттү. Иш-чара эл аралык кызматташтыкты өнүктүрүү жана чет өлкөлөрдүн катышуусундагы долбоорлорду ишке ашыруу маселелерин талкуулоо максатында уюштурулду.
Жолугушууга маданият, маалымат жана жаштар саясаты министринин биринчи орун басары Союзбек Надырбеков жана министрликтин башкармалыктарынын начальниктери, бөлүм жана секторлорунун башчылары ошондой эле Тышкы иштер министринин орун басары Темирбек Эркинов башында турган Тышкы иштер министрлигинин өкүлдөрү катышты.
Жолугушуунун жүрүшүндө маданий кызматташтыкты кеңейтүү, эл аралык долбоорлорду ишке ашыруу жана чет өлкөлүк өнөктөштөр менен маданий байланышты чыңдоо маселелери каралды. Тараптар өз ара кызматташуунун актуалдуу багыттарын белгилеп, биргелешкен иш-чараларды өткөрүү боюнча пландарды талкуулашты.
Маданият министринин биринчи орун басары Союзбек Надырбеков белгилегендей, эл аралык деңгээлде маданий долбоорлорду ийгиликтүү ишке ашыруу Кыргызстан үчүн чоң мааниге ээ. Ошондой эле, өлкөнүн маданий мурасын жана улуттук баалуулуктарын дүйнөлүк аренада жайылтуу боюнча жаңы демилгелерди ишке ашыруу зарылдыгын баса белгиледи.
Тышкы иштер министрнин орун басары Темирбек Эркинов маданий долбоорлорду ишке ашырууда дипломатиялык колдоо көрсөтүүгө жана эл аралык өнөктөштөр менен кызматташууну өнүктүрүүгө даярдыгын билдирди.
Жолугушуунун жыйынтыгында тараптар маданий долбоорлорду ишке ашыруу боюнча биргелешкен аракеттерди жаңы нукта улантууга макулдашып, өз ара кызматташтыкты бекемдөөгө ынтызарлыгын билдиришти.
