26-октябрда Бишкек шаары маданий окуянын борборуна айланды: дүйнөгө белгилүү музыкант, музыковед, пианист жана таланттуу лектор Михаил Казиник классикалык музыка сүйүүчүлөр үчүн лекция окуду. Өзүнүн өнөрү менен дүйнөнүн көптөгөн өлкөлөрүндө элдин жүрөгүн багындырган Казиник Бишкек шаарынын тургундарына классикалык музыканы таанып-билүү үчүн эшик ачты. Лекцияга студенттер, искусствону баалаган көрөрмандар жана өлкөнүн маданият чөйрөсүнүн белгилүү өкүлдөрү катышты. Алардын арасында Кыргыз Республикасынын маданият, маалымат, спорт жана жаштар саясаты министринин биринчи орун басары Чыңгыз Эсенгул уулу да болду.

Михаил Казиник – классикалык музыканы жаңыча ачып, аудиторияны шыктандыра алган инсан. Анын лекциялары көптөн бери интеллектуалдык окуя катары кабылданып келет: Казиник музыканы жөн гана айтып бербестен, аны менен кошо адамзаттын философиясын, рухун жана умтулуусун чагылдырат. Бишкектеги лекциясында музыкант XIX жана XX кылымдагы композиторлордун чыгармаларына өзгөчө көңүл буруп, бул музыка бүгүнкү күндө да актуалдуу экенин айтты.

Казиник музыканын маанисин терең кабыл алууга өзгөчө басым жасады. “Музыка жөн эле үндөрдүн жыйындысы эмес — ал бизди сезүүгө, ой жүгүртүүгө мажбурлайт, ал жан дүйнөбүздү ойготот,” — деп белгиледи Михаил Казиник. Лекциянын негизги өзөгү аудиторияга ноталардын аркасында көркөм образдарды жана алардын канчалык терең мааниге ээ экенин ачып көрсөттү.

Кыргыз Республикасынын маданият, маалымат, спорт жана жаштар саясаты министринин биринчи орун басары Чыңгыз Эсенгул уулу музыкантка Кыргызстандагы маданият жана билим берүүгө кошкон салымы үчүн ыраазычылык билдирип, мындай иш-чаралар өлкөнүн маданий мурасын түзүүдө жана эл аралык маданий диалогду чыңдоодо чоң мааниге ээ экенин белгиледи. “Мындай көрүнүктүү инсандар биздин өлкөбүзгө келип, музыкага болгон сүйүүсүн жаштар менен бөлүшүп жатканына кубанычтабыз. Бул жаштарыбыздын маданий деңгээлин жогорулатып, аларды жаңы ийгиликтерге шыктандырат,” — деп баса белгиледи Эсенгул уулу.

Казиниктин Бишкектеги лекциясы маданий гана эмес, билим берүүчү окуяга айланды. Ал музыкалык жана гуманитардык окуу жайларынын студенттерине, ошондой эле искусствого кызыккандарга классикалык музыка дүйнөсүн чыныгы устаттын көз карашы менен көрүүгө мүмкүнчүлүк түздү. Көпчүлүк үчүн бул музыка дүйнөсүнө тереңирээк түшүнүүгө жол ачкан биринчи кадам болуп калды.

Мындай окуялар кыргызстандыктардын классикалык өнөргө кызыгуусунун өскөнүн жана алардын жогорку деңгээлдеги маданий өнүгүүгө умтулуусун көрсөтөт.