“Салттуу кол өнөрчүлүк жаатында маданий туристтик продукцияларды жаратуу” боюнча сынагынын жеңүүчүлөрү сыйланды
Бүгүн, 4-мартта Бишкек шаарында 2024-жылы “Салттуу кол өнөрчүлүк жаатында маданий туристтик продукцияларды жаратуу” боюнча сынагынын жеңүүчүлөрүн сыйлоо аземи өттү.
Иш-чара Кыргызстанда материалдык эмес маданий мурастарды жана туруктуу туризмди жайылтуудагы жетишкендиктерди белгиледи.
Сыйлоо аземи Кыргыз Республикасы менен Корея Республикасынын ортосундагы өнөктөштүктө “Кыргыз Республикасында салттуу кол өнөрчүлүк буюмдарын өндүрүү жана алардын санариптик маркетинг дараметин жогорулатуу аркылуу маданий туризмди өнүктүрүү” (2023-2026) Өнүктүрүүгө Расмий Жардам долбоорунун алкагында уюштурулду.
Ага Кыргыз Республикасынын маданият, маалымат жана жаштар саясаты министринин орун басары Гүлбара Абдыкалыкова, Кыргыз Республикасынын ЮНЕСКО иштери боюнча Улуттук комиссиясынын жооптуу катчысы Солтонгелдиева, Корея Республикасынын Кыргыз Республикасындагы Элчиси Ким Кванджэ, Корея Республикасынын ЮНЕСКОнун (ИЧКАП) (Кореядагы штаб квартира) колдоосу алдындагы Азия-Тынч океан аймагындагы материалдык эмес маданий мурастар боюнча эл аралык маалыматтык-тармактык борборунун башкы директору Джисан Ким ошондой эле маданий уюмдардын, кол өнөрчүлөрдүн өкүлдөрү, долбоордун өнөктөштөрү катышышты.
Сынак Кыргызстандын бай салттарын жана кол өнөрчүлүк чеберчилигин чагылдырган маданий туристтик продуктуларды иштеп чыгууда инновациялык жана чыгармачылык ыкмаларды колдоого багытталган.
Сыйлыктар эки категорияда берилди:
- “Идея” категориясы – маданий туристтик продукциянын заманбап концепцияларын чагылдырган долбоорлор үчүн. Бул категорияда туристтердин көңүлүн жана кызыгуусун арттыра турган турпродуктуларды түзүүнүн уникалдуулугу жана жаңычылдыгы бааланды;
- “Даяр продукция” категориясы – даяр формага ээ болгон жана туризм индустриясында колдонула турган долбоорлор үчүн. Бул категория Кыргызстандын туристтик тармагына киргизүүгө даяр жана оңой интеграциялануучу, ошондой эле эл аралык рынокторго жайылтылуучу долбоорлорго арналган.
Иш-чара катышуучулардын бейформал баарлашуусу менен аяктап, алар материалдык эмес маданий мурастарды, атап айтканда, Кыргызстандын салттуу кол өнөрчүлүгүн, туризмди жана санариптик маркетингди илгерилетүү жаатында мындан аркы кызматташууну талкуулашты.
Бул долбоор маданий туризмдин өлкөнүн экономикалык өнүгүүсүнүн, айрыкча жергиликтүү кол өнөрчүлөрдүн жана жамааттардын негизги элементи катары маанилүүлүгүн баса белгилейт. Салттуу кол өнөрчүлүктү колдоо жана аларды туристтик индустрияга интеграциялоо Кыргызстандын материалдык эмес маданий мурасын туруктуу өнүктүрүүгө жана сактоого өбөлгө түзөт.
