Бишкекте “Азербайжан искусствосунун берметтеринде жашаган улуттук мурас” аттуу көргөзмөсү ачылды
Бүгүн, 21-апрелде Гапар Айтиев атындагы Кыргыз улуттук көркөм сүрөт музейинде “Азербайжан искусствосунун берметтеринде жашаган улуттук мурас” аттуу көргөзмөнүн салтанаттуу ачылышы болуп өттү. Бул иш-чара Кыргыз Республикасында өтүп жаткан Азербайжан Республикасынын маданият күндөрүнүн алкагында уюштурулду.
Иш-чарага Кыргыз Республикасынын Маданият, маалымат жана жаштар саясаты министринин орун басары Гүлбара Абдыкалыкова, Азербайжан Республикасынын Маданият министринин орун басары Мурад Фарид оглы Гусейнов, дипломатиялык корпусунун өкүлдөрү, маданият жана искусство ишмерлери, ошондой эле коомчулуктун өкүлдөрү катышты.
Гүлбара Абдыкалыкова өз сөзүндө бул көргөзмө жөн гана искусство чыгармаларынын жыйнагы эмес, бул азербайжан элинин жандуу тарыхы, эстетикалык философиясы жана руханий тереңдигин көрсөткөн маданий мурасы экендигин баса белгиледи.
Лента кесүү аземинен кийин көрүүчүлөр Азербайжан Улуттук искусство музейи даярдаган, ар түрдүү эмгектерди камтыган экспозицияны көрүштү.
Көргөзмөнүн борбордук бөлүгүн Азербайжан станоктук живопистин негиздөөчүсү, көрүнүктүү сүрөтчү Мирза Гадим Эриванинин 200 жылдык мааракесине арналган эмгектери түздү. XIX кылымдагы көркөм искусствонун негизги өзгөчөлүктөрүн чагылдырган бул чыгармалар азербайжан сүрөтчүлүгүнүн өнүгүш тарыхында маанилүү этаптарды көрсөтөт.
Экспозицияда салттуу кол өнөрчүлүктүн өзөгү болгон байыркы килем токуу өнөрү өзгөчө орунду ээледи. Көрүүчүлөргө ворстуу жана ворссуз килемдер, металлдан жасалган көркөм буюмдар, сайма жана XIX кылымдан бүгүнкү күнгө чейинки декоративдик-колдонмо искусствонун үлгүлөрү көрсөтүлдү. Бул экспонаттар Азербайжан Улуттук Килем музейинин фондунан алынды.
Заманбап авторлордун арасынан Азербайжандын эл сүрөтчүсү Эльдар Микаилзаденин эмгектери көрсөтүлдү. Ал учурдагы искусствонун эң көрүнүктүү өкүлдөрүнүн бири болуп саналат.
Көргөзмөдө “Гурама” деп аталган көркөм текстиль искусствосуна арналган өзүнчө бөлүм чоң кызыгуу жаратты. Бул байыркы лоскут ыкмасын сактап келген жана өнүктүрүп жаткан устат Халида Насирова тарабынан жасалган эмгектерде салт менен заманбаптык айкалышып, өзгөчө чыгармачылык көрүнөт.
“Шебеке” – түстүү айнектерден жасалган көркөм композициялар — көргөзмөдө устат Гусейн Гаджимустафазаде тарабынан мастер-класс форматында көрсөтүлдү. Келгендер ушул өзгөчө кооз кол өнөрчүлүк жаралышынын процесси менен түз таанышуу мүмкүнчүлүгүнө ээ болушту.
Көргөзмөнүн зергерлик бөлүгүндө сүрөтчү Физули Ализаденин улуттук орнаменттерге негизделген, ошол эле учурда заманбап стилде жасалган кооз жасалгалары сунушталды.
Көркөм көргөзмөнүн соңунда жаш модельер Зумруд Мирзалиеванын кийим коллекциясы тартууланды. Ал өз моделдеринде салттуу орнаменттер менен заманбап формаларды айкалыштырып, өткөн менен бүгүнкү күндүн көркөм диалогун жараткан.
Экспозициянын маанилүү бөлүктөрүнүн бири — “Карабах — улуттук мурастын элеси” аттуу фотокөргөзмө болуп, ал аймактын маданиятын жана тарыхый маанисин чагылдырган сүрөттөр аркылуу баяндап берди.
Аталган көргөзмө бир нече күнгө созулат.
