Эл жазуучусу Шаршеналы Абдылдаев акыркы сапарга узатылды
Бүгүн, 24-июнда Кыргыз Республикасынын эл жазуучусу, Кыргыз Республикасынын маданиятына эмгек сиңирген ишмер, көрүнүктүү жазуучу жана котормочу Шаршеналы Абдылдаев менен коштошуу зыйнаты болду.
Белгилүү калемгерди акыркы сапарга узатуу зыйнатына Кыргыз Республикасынын Министрлер Кабинетинин Төрагасынын орун басары Эдиль Байсалов, Кыргыз Республикасынын Маданият, маалымат жана жаштар саясаты министринин орун басары Тимурлан Ажымалиев, акын-жазуучулар, маданият ишмерлери жана маркумдун жакындары катышты.
Шаршеналы Абдылдаев кыргыз адабиятына терең из калтырган жазуучу, ал өмүрүн эне тилге кызмат кылууга, дүйнөлүк классиктердин чыгармаларын кыргызчага которууга жана жаңы муундагы калемгерлерди тарбиялоого арнаган. Анын чыгармалары улуттук маданияттын ажырагыс бөлүгүнө айланып, өзү кыргыз адабиятынын бийик үлгүсү катары эскерилет.
Шаршеналы Абдылдаевдин сөөгү Бишкектеги “Ала-Арча” көрүстөнүнө коюлду.
