Бүгүн, 26-июнда Т. Абдумомунов атындагы Кыргыз улуттук академиялык драма театрынын 98-театарлдык сезону режиссёр Уланмырза Карыпбаев сахналаштырган, Кайрат Иманалиевдин “Акыркы кат” спектакли менен жыйынтыктады. 

Театралдык сезондун жабылышына Кыргыз Республикасынын Президентинин Администрациясынын Жетекчисинин орун басары - Президенттин жана Министрлер Кабинетинин чечимдерин даярдоо боюнча башкармалыгынын башчысы Азамат Кадыралиев, Маданият, маалымат жана жаштар саясаты министри Мирбек Мамбеталиев баштаган мамлекеттик жана коомдук ишмерлер, Төрөкул Айтматов менен Нагима Айтматованын кызы Роза Айтматова, маданият жана искусство ишмерлери, ошондой эле шаар тургундары менен театр күйөрмандары катышты.

Спектаклде Кара-Кыргыз автономиялуу облусун түзүүдөн тартып элибиздин келечеги үчүн жан үрөгөн улуу инсандардын, алардын бири көрүнүктүү мамлекеттик ишмер Төрөкул Айтматовдун эрдиги, элибиздин 20-кылымдын 20-30-жылдардагы башынан кечирген тагдыры чагылдырылган. Автор калыптануу жылдардын катаал таразасында калчанган энелердин тагдыры, бирок алардын сынбаган, майтарылбаган эрдигине Нагима Айтматованын баскан жолу аркылуу кайрылган.

Чыгарма Кыргызстандын тарыхындагы маанилүү даталарга – Кара-Кыргыз автономиялуу облусунун түзүлгөндүгүнүн 100 жылдыгына, көрүнүктүү мамлекеттик ишмер Төрөкул Айтматов жана анын жубайы Нагима Айтматованын 120 жылдык мааракелерине арналган.

Эске салсак, “Акыркы кат” спектаклинин бет ачары 2025-жылдын 11-мартында болуп өткөн.

Спектакль Маданият, маалымат жана жаштар саясаты министрлигинин колдоосу менен даярдалган.