Кыргыз Улуттук академиялык опера жана балет театрынын сахнасында 300 артист бир сахнада
Абдылас Малдыбаев атындагы Кыргыз Улуттук академиялык опера жана балет театрынын башкы хормейстери, Кыргыз Республикасынын эл артисти Карагул Тиленчиевдин 60 жылдыгына жана чыгармачылгынын 40 жылдыгына арналган юбилейлик кече өттү.
Кош юбилейлик мааракеге Кыргыз Республикасынын Маданият, маалымат, спорт жана жаштар саясаты министринин биринчи орун басары Тимурлан Ажымалиев катышып, куттукттоо сөз сүйлөдү.
Өз жашоосун бүтүндөй искусство тармагына арнаган Карагул Тиленчиевге бекем ден-соолук, чыгармачылык ийгилик жана эргүү каалады.
Карагул Тиленчиев опера сахнасында улуттук, орус жана чет элдик классиктердин спектаклдерин ишке ашыргандардын бири.
Театрдын жамааты менен бир нече жолу республиканын шаарларына жана чет өлкөлөргө гастролдук сапарларга чыгуу менен көптөгөн мамлкеттик маанидеги иш чараларадын өтүшүнө өз салымын кошуп келет. Ал Кыргыз Республикасынын Мамлекеттик гимнин жаздыруучу хормейстер-коюучу катары активдүү катышкан.
Маэстронун педагогикалык ишмердүүлүгү көп кырдуу: театрдын алдындагы опера-хор студиясынын жетекчиси, Б.Бейшеналиева атындагы Кыргыз мамлекеттик маданият жана искусство университетинин хор дирижерлугу кафедрасынын доценти, Кыргыз-Түрк "Манас"университетинин улук окутуучусу болуп эмгектенет.
Бүгүнкү өткөн концерттик программада дүйнөлүк классиканын белгилүү хор чыгармалары, ошондой эле Карл Орфтун хор шедеври – республиканын хор жамааттарынын жана театрдын симфониялык оркестринин 300 артисти аткарган "Кармина Бурана" сахналык кантатасы жаңырды.
