Кыргызстанга Азербайжандын маданий делегациясы келди
Бүгүн, 20-апрелде Азербайжан Республикасынын Кыргыз Республикасында өтө турган маданият күндөрүнө карата Азербайжан Республикасынын белгилүү маданият ишмерлеринен турган расмий делегация Кыргызстанга келди.
Маданий делегацияны “Манас” эл аралык аэропортунан Кыргыз Республикасынын Маданият, маалымат жана жаштар саясаты министринин орун басары Тимурлан Ажымалиев жетектеген министрликтин кызматкерлери жылуу маанайда тосуп алды.
Эртең, 21-апрелден 25-апрелге чейин Бишкек шаарында Азербайжан Республикасынын маданият күндөрүнүн алкагында концерттик программалар, спектаклдер, сүрөт көргөзмөлөрү жана адабий, маданий иш-чаралар өтөт. Бул иш-чаралар аркылуу кыргызстандык көрүүчүлөргө азербайжан элинин бай маданияты, салт-санаасы жана искусствосу менен жакындан таанышууга мүмкүнчүлүк түзөт.
Маданият күндөрү Кыргызстан менен Азербайжан элдеринин ортосундагы достукту, өз ара түшүнүшүүнү жана маданий байланыштарды мындан ары да тереңдетүүгө багытталган.
