Маданият министри ТҮРКСОЙ уюмунун баш катчысынын ыр челленджин кабыл алды
Кыргыз Республикасынын Маданият, маалымат жана жаштар саясаты министри Мирбек Мамбеталиев ТҮРКСОЙ эл аралык уюмунун баш катчысы, Кыргыз Республикасынын эл жазуучусу Султан Раев тарабынан башталган ыр челленджин кабыл алып, акын Жолон Мамытовдун “Отту сүйөм” аттуу ырын көркөм окуду.
Челленджди Кыргыз Республикасынын Улуттук жазуучулар союзунун төрагасы Каныбек Иманалиевге узатты.
Эске салсак, 2025-жылдын 28-29-30-май күндөрү Ош шаарында кыргыздын белгилүү акыны Жолон Мамытовдун 85 жылдыгына карата түрк дүйнөсүнүн жаш акындарынын Жолон Мамытов атындагы “Жашыл аалам” фестивалы өтөт.
Фестивалга Азербайжан, Венгрия, Казакстан, Кыргызстан, Түркия, Түркмөнстан, Өзбекстан өлкөлөрүнүн жаш акындары катышат.
