Министр Алтынбек Максутов “Устаттан-шакиртке” көргөзмөсүнүн ачылышына катышты
21-ноябрда Кыргыз Республикасынын маданият, маалымат, спорт жана жаштар саясаты министри Алтынбек Максутов “Устаттан-шакиртке” аттуу көркөм сүрөт көргөзмөсүнүн расмий ачылышына катышты. Иш-чара Кыргыз-Түрк “Манас” университетинде өтүп, маданият ишмерлерин, студенттерди жана искусствону баалагандарды чогултту.
“Устаттан-шакиртке” көргөзмөсүндө белгилүү сүрөтчүлөрдүн жана алардын шакирттеринин эмгектери биргелешип сунушталып, муундар арасындагы искусство салттарынын туруктуулугу жана устат-шакирт байланышы чагылдырылды.
Министр Алтынбек Максутов ачылышта сөз сүйлөп, төмөнкүлөрдү белгиледи:
“Сүрөтчүлүктүн чеберчилиги — бул жөн гана талант эмес, эмгектин, билимдин жана шыктандыруунун натыйжасы. “Устаттан шакиртке” көргөзмөсү — бул чеберлердин тажрыйбасы жаш сүрөтчүлөрдү кантип шыктандырып, биздин искусствонун салттарын бекемдеп жаткандыгынын ачык үлгүсү”.
Министр мындай иш-чаралар коомдун маданий өнүгүүсү жана руханий байыгуусу үчүн маанилүү экенин баса белгилеп, көргөзмөнүн уюштуруучуларына жана катышуучуларына ыраазычылык билдирди.
Көргөзмөнүн ачылышы өлкөнүн маданий турмушундагы маанилүү окуялардын бири болуп, кыргыз сүрөтчүлөрүнүн жана алардын шакирттеринин чыгармачылыгына көңүл бурдурду. Көрүүчүлөр классикалык салттарды жана заманбап искусствого болгон көз карашты чагылдырган чыгармаларды көрүү мүмкүнчүлүгүнө ээ болушту.
