МИНИСТР МОНГОЛИЯГА БАРА ТУРГАН ЭКСПЕДИЦИАЛЫК ТОПТУ КАБЫЛ АЛДЫ
Бүгүн, 13-август күнү министр Мирбек Мамбеталиев Монголиянын Баян-Улгий жана Увс аймактарында кыргыздарга карата илимий изилдөө иштерин жүргүзүү максатында кетип жаткан жумушчу топ менен жолукту.
Илимий топ Кыргыз Республикасынын Президентинин 2024-жылдын 18-декабрындагы “Улуттук дем - дүйнөлүк бийиктик” уңгужолу жөнүндө” Жарлыгынын алкагында кетип жатат. Анда кыргыздардын, кыргыз тектүү этностордун, ошондой эле кыргыздар менен байланышкан тарыхый, маданий жана фольклордук мурастарын илимий жактан изилдөө иштерин жүргүзүү Монголияда ушул жылдын 14-28-август күндөрү өтөт.
Мамлекет тарабынан алгачкы жолу уюштурулуп жаткан бул экспедиция Кыргызстан менен Монголиянын ортосундагы этномаданий жана тарыхый байланыштарды кайра жандандыруу, ошондой эле жоголуу коркунучунда турган руханий жана материалдык мурастарды сактап калуу максатында жүргүзүлөт.
Бул максат Кыргызстандагы этнография, тарых, фольклористика, лингвистика жана тарыхый география тармактары үчүн жаңы булактарды ачууга багытталган.
Белгилей кетсек, бул изилдөөнүн жыйынтыгы менен Кыргыз Республикасынын Маданият, маалымат жана жаштар саясаты министрлиги тарабынан илимий басылма жарыкка чыгат жана документалдуу фильм тартылат.
