Гүлайым Каниметованын чыгармачылыгынын 60 жылдыгына арналган театр жумалыгы башталды
Бүгүн, 13-майда Т. Абдумомунов атындагы Кыргыз улуттук академиялык драма театрында Кыргыз Республикасынын эл артисти, Токтогул атындагы мамлекеттик сыйлыктын лауреаты Гүлайым Каниметованын чыгармачылыгынын 60 жылдыгына арналган театр жумалыгы башталды.
Иш-чаранын ачылышына Кыргыз Республикасынын Маданият, маалымат жана жаштар саясаты министри Мирбек Мамбеталиев катышып, куттуктоо сөзүн сүйлөп, белгилүү актрисанын талантын, кесибине болгон астейдил мамилесин белгилеп, улутубуздун профессионалдык искусствосун өнүктүрүүдө белсемдүү салым кошуп, чаалыкпастан эмгектенип келе жатканына ыраазычылык билдирди.
Аталган иш-чарага келген Гүлайым Каниметованын замандаштары, кесиптештери, маданият тармагындагы көрүнүктүү ишмерлер жана театр сүйүүчүлөрү анын катышуусундагы режиссёр Уланмырза Карыпбаев тарабынан сахналаштырылган драматург Кайрат Иманалиевдин “Акыркы кат” спектаклине күбө болушту.
Чыгармачылык жумалык 17-майга чейин уланып, анын катышуусундагы ар кыл спектаклдер коюлуп, сахнадагы бай тажрыйбасы дагы бир ирет элге сунушталат.
Жумалыктын алкагында төмөнкү спектаклдер коюлат:
14-май – Ж. Садыков “Төлгө” (эпикалык драма);
15-май – Ч. Айтматов “Эсимде” (драма);
16-май – Т. Касымбеков, К.Сактанов “Курманжан Датка” (тарыхый драма);
17-май – М. Карим “Ай тутулган түндө” (трагедия).
