МАДАНИЯТ МИНИСТРЛИГИ МАМЛЕКЕТТИК ТИЛ МАЙРАМЫНА КАРАТА “КЫРГЫЗ ТИЛИ” ТӨШ БЕЛГИСИ МЕНЕН СЫЙЛАНДЫ
23-сентябрда Кыргыз Республикасынын Улуттук илимдер академиясында Мамлекеттик тил күнүнө карата Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиясы тарабынан салтанаттуу иш-чара уюштурулду.
Иш-чарада Кыргыз Республикасынын Жогорку Кеңешинин депутаттары Министрлик жана ведомстволордун жетекчилери, Мамлекеттик тил боюнча адистер, Бишкек шаарынын мэриясынын жана шаардык кеңешинин өкүлдөрү, Улуттук илимдер академиясынын окумуштуулары, Улуттук комиссиянын Кеңешме органынын мүчөлөрү жана ЖМК өкүлдөрү болду.
Маданият, маалымат жана жаштар саясаты министрлигинин атынан министрдин биринчи орун басары Союзбек Надырбеков катышты.
Кыргыз Республикасынын Мамлекеттик катчысы Марат Иманкулов, Кыргыз Республикасынын Улуттук илимдер академиясынын вице президенти Чолпонкул Арапбаев, Улуттук комиссиянын төрагасы Мелис Мураталиев Мамлекеттик тил күнү менен куттукташып, баяндама окушту.
Мамлекеттик тил жана тил саясаты боюнча улуттук комиссия тарабынан белгилүү тилчилерге, мамлекеттик кызматкерлерге жана жарандык активисттерге ардак грамоталар жана атайын сыйлыктар ыйгарылды.
Ошондой эле, буга чейин мамлекеттик органдардын борбордук аппараттарында мамлекеттик тилдин абалына байланыштуу Мамлекеттик тил жана тил саясаты боюнча улуттук комиссия жүргүзгөн мониторингдин жыйынтыгынын негизинде, алдыңкы беш мекеме “Кыргыз тили” төш белгиси менен сыйланды. Алардын катарында Маданият, маалымат жана жаштар саясаты министрлиги да бар.
Иш-чаранын жүрүшүндө Кыргыз энциклопедиясы жана терминология борбору тарабынан даярдалган 26 китептин көргөзмөсү сунушталды.
