“Мурасты сактоо жана коргоо: маданий байлыктардын мыйзамсыз жүгүртүүсүнө каршы аракеттер” аттуу республикалык форум өттү
2025-жылдын 16-19-июнь күндөрү Кыргыз Республикасынын Маданият, маалымат жана жаштар саясаты министрлигинин колдоосу менен тарыхый-маданий мурастарды сактоо жана маданий баалуулуктардын мыйзамсыз жүгүртүлүшүнө каршы туруу боюнча актуалдуу маселелерге арналган Республикалык форум өттү.
Форум Бишкек шаарында жана Ысык-Көл облусунда өтүп, өлкөнүн ар түрдүү мамлекеттик органдарынын жана аймактык түзүмдөрүнүн өкүлдөрүн бириктирген алгачкы ведомстволор аралык аянтча болду. Форумга мамлекеттик органдардын (Маданият, маалымат жана жаштар саясат министрлиги, ИИМ, Чек ара жана Бажы кызматтары), музейлердин, илимий институттардын, жарандык коомдун жана эл аралык уюмдардын – ЮНЕСКОнун, ИКОМдун жана башка өнөктөштөрдүн өкүлдөрү катышты.
Иш-чаранын алкагында маданий мурастардын мыйзамсыз чыгарылышы, жоголушу жана бузулушу сыяктуу негизги көйгөйлөр талкууланып, коркунуч жарата турган аймактар, тиешелүү мыйзамдык ченемдер, мекемелер аралык өз ара аракеттенүүнүн деңгээли жана адистердин даярдыгы боюнча маселелер көтөрүлдү. Айрыкча археологиялык эстеликтерди, музейдик коллекцияларды жана материалдык эмес мурастарды коргоого көңүл бурулду.
Форумдун алкагында пленардык сессиялар, эксперттик панелдик талкуулар, тематикалык топтордун иштери жана жеринде таанышуу иш-чаралары өтүп, натыйжасында профилдик органдар үчүн конкреттүү сунуштарды камтыган Резолюция иштелип чыгат.
Ошондой эле форум Курманжан Датка атындагы Көчмөн цивилизациясы борборунун ишмердүүлүгүн жана балбал таштардан турган уникалдуу коллекцияны сактап калуу долбоорун тааныштыруу үчүн да аянтча болду.
Форум Кыргыз Республикасында музей ишинин 100 жылдыгына арналган юбилейлик иш-чаралардын алкагында өтүп, маданий мурастарды коргоо боюнча биргелешкен мамилелерди иштеп чыгууга багытталган маанилүү кадам болуп, музейлер, маданият мекемелери менен күч түзүмдөрүнүн ортосундагы байланыштарды бекемдөөгө өбөлгө түздү. Катышуучулар бул демилгени улантууга жана улуттук аракеттер планын иштеп чыгууга кызыкдар экендигин билдиришти.
