Вокалдык коуч Карина Купердин мастер-классы башталды
Бүгүн 1-апрелде, Кыргыз улуттук “Манас” театрында дүйнөгө белгилүү вокалдык коуч, GRAMMY Recording Academy мүчөсү жана GrammyU ментору Карина Купердин мастер-классынын биринчи күнү өтүүдө. Ага ырчылар, актёрлор, музыкалык жана актёрдук чеберчилик багытында билим алып жаткан студенттер катышты.
Мастер-классты Кыргыз Республикасынын Маданият, маалымат жана жаштар саясаты министринин кеңешчиси Бактыбек Секимов ачып, мындай иш-чаралар кыргыз маданиятынын өнүгүшүнө чоң салым кошоорун белгиледи. Мастер-класс өлкөбүздүн вокалдык искусствосун өркүндөтүүгө, профессионалдык жактан өсүүгө умтулгандардын бардыгы үчүн маанилүү окуя экенин белгилеп, Карина Куперге өзүнүн тажрыйбасын биздин таланттар менен бөлүшкөнү үчүн ыраазычылык билдирди.
Карина Купер мастер-класс учурунда вокалдык остеопатия – үн менен иштөө боюнча революциялык ыкма, дем алуу илими – биофоника – үн көзөмөлдөө жана өнүктүрүү техникасы боюнча вокалдык ыкмалары тууралуу өзүнүн тажрыйбасы менен бөлүштү. Ал чыгармачылык өнүгүүдө үн менен иштөө техникасынын маанилүүлүгүн баса белгилеп, катышуучуларга практикалык тапшырмаларды аткарууга мүмкүнчүлүк берди.
Мастер-класс катышуучулар тарабынан кызуу кабыл алынып, көптөгөн суроо-жооптор менен коштолду. Ырчылар жана актёрлор Карина Купердин кеңештерин кызыгуу менен угуп, анын көп жылдык тажрыйбасынан кызыктуу маалыматтарды алышты.
Бул мастер-класс Кыргыз Республикасынын маданиятын өнүктүрүүгө багытталган демилгелердин бири болуп саналат жана Кыргыз Республикасынын Маданият, маалымат жана жаштар саясаты министрлигинин колдоосу менен өтүп жатат.
Белгилей кетсек, Карина Купердин мастер-классы эртең 2-апрелде да уланат.
